- මා දුටු මුල්ම නිහඬ විප්ලවවාදියා -

විප්ලවය කියන වචනේ ඇහුණත් ඇති මේ දවස්වල නම් අපේ ඔළුවට එන්නේ දේශපාලනේ ගැන තමයි.

ඒත් මේ කියන්න යන කතාව නම් දේශපාලනයට අදාල නැහැ.

මේ කතාව අදාල වෙන්නේ ක්‍රිකට් ක්‍රීඩාවට.

හරි, මෙහෙම අහන්නම්කෝ!

උඹලට හිතෙන විදියට 'විප්ලවයක්' කරනවා කියන්නේ මොකක්ද?

විප්ලවයක් කියන්නේ උද්ඝෝෂණය කරන එකට විතරමද?

මම නම් හිතන්නේ විප්ලවයක් කියන්නේ,

වෙන කවුරුහරි හදපු සීමා මායිම්,

රාමුවලට කොටු වෙන්නේ නැතුව,

අළුත්,වෙනස් විදියට හිතන,

දැනට තියෙන තත්වය වෙනස් කරලා වැඩි දියුණු කරන්න කැපවෙන එක!

ඒක දේශපාලනයටම විතරක් සීමාවෙන දෙයක් නෙවෙයි!

කොටින්ම කියනවනම් ක්‍රිකට් ගහනකොටත් විප්ලව කරපු අය ඉන්නවා.

හොඳම උදාහරණේ මේ අපේ රට!

බාධක කම්කටොළු එක්ක හැප්පිලා,

මහා විප්ලවයක් කරලා තමයි අපේ ක්‍රිකට් කණ්ඩායම 1996 අවුරුද්දෙදි ලෝක කුසලානයක් ජයග්‍රහණය කලේ.

1996 ලෝක කුසලාන ජයග්‍රහණය ගැන කතාකරනකොට මුලින්ම කියවෙන්නේ කලූ - සනා දෙන්නා ගැන.

ඒ දෙන්නා එකතුවෙලා, 

සීමිත ඕවර ක්‍රිකට් තරඟවල මුල් ඕවර වලදි පන්දුවට පහරදෙන විදිය සදහටම වෙනස් කලා.

ඒත් අද නම් මේ ලියන්නේ කලූ - සනා ගැන නෙවෙයි.

අද කතාව ලියවෙන්නේ 'මෑඩ් මැක්ස්' ගැන...!

මෑඩ් මැක්ස් නිහඬව කරපු විප්ලවේ ගැන!

කලූ - සනා බය නැතුව බෝලෙට රිදෙන්න ගහලා ලෝකේ පෙරලුව එක ඇත්ත.

ඒත් ඒ දෙන්නට බය නැතුව ඒ දේ කරන්න පුළුවන්කම තිබ්බේ ගුරා,අරා,අර්ජුන,

මහනාම,හෂාන් වගේ අයගේ බැකප් එක නිසා.

විශේෂයෙන්ම අරා නිසා!

ඒ කාලේ අපේ ටීම් එකේ කොඳු නාරටිය අරා!

ආපු දවස්වල එච්චර වගකීමකින් පන්දුවට පහර දුන්නේ නැති උනත් පසුකාලීනව අරා ඒක වෙනස් කරගත්තා.

විප්ලවයක් කරලා ලෝක කුසලානයක් ජයග්‍රහණය කරපු ඒ ගමනේ ප්‍රධාන කොටස්කරුවෙක් උනා.

හරියට කියනවනම් අරා තමයි ලංකාවේ ලංකාවේ බිහිවුණ පළවෙනි ක්‍රිකට් සුපර්ස්ටාර්!

ඊට කලින් අපෙ රටේ ක්‍රිකට් ගහපු මිනිස්සු අදක්ෂයෝ කියනවා නෙවෙයි.

ටෙස්ට් වරම් ලැබෙන්න කලිනුත්,

ලැබිලා අවුරුදු 10ක් විතර යනකනුත්,

අපේ රටේ හිටිය දක්ෂයොන්ට ඒ තරම් තැනක් ජාත්‍යන්තරයෙන් නම් ලැබුණේ නැහැ.

අපිට ලැබුණු ඒ කුඩම්මගේ සැලකිල්ල වෙනස්කරන්න මුල්වුණේ අරා!

වැඩි සද්ද බද්ද නැතුව බැට් එකෙන් විතරක් වැඩ පෙන්නපු,

සිස්ටම් චේන්ජ් කරපු,

අනිත් අයට තිබුණු සීමා මායිම් නොතිබුණු අරා,

නිහඬ විප්ලවවාදියෙක් කියලා මම කිව්වේ ඒකයි!

මට මතක විදියට අරා පිතිකරණයේ යෙදෙන හැටි මම මුලින්ම දැක්කේ 1995 අවුරුද්දෙදි.

එතකොට මම ඉස්කෝලේ 1 වසරේ ඉගෙනගන්න කාලේ.

ඒත් එදා අරා කෙන්ට් ප්‍රාන්තය වෙනුවෙන් බෙන්සන් & හෙජස් කවුන්ට්‍රි ෆයිනල් එකක ශතකයක් ලබාගත්ත හැටි කලු සුදු ටීවී එකක දැකපු විදිය නිකන් හීනයක් වගේ තාමත් මතකයි.

ඒත් කවදාවත් අමතක වෙන්නේ නැති අරාගේ හොඳම ඉනිම වගේම,

පෞද්ගලිකව මම වැඩිපුරම කැමති ඉනිම නම් දැක්කේ 1996 අවුරුද්දෙදි.

ඒ 1996 ලෝක කුසලානේ අවසාන පූර්ව තරඟයෙදි අරා රැස්කරපු ලකුණු 66 ඉනිම.

අදකාලේ හැදෙන උන්දැලට නම් මේ මම කියන දේ විහිළුවක් වගේ පේන්නත් පුළුවන්!

කොටින්ම කියනවනම්,

අපෝ උඹේ ඔය මහලොකු වැඩ්ඩගේ හොඳම ඉනිම ලකුණු 66යිද?

කියලා හිතෙන,අහන අය ඕනතරම් ඉඳීවි.

ඒත් ඒ ලකුණු 66 ලකුණු 200කටත් වඩා වටිනවා කියලා ඒක දැකපු,අහපු අය නම් ඉහටත් උඩින්ම පිළිගනීවි.

සැමන් ටින් එකක සැමන් පැක් කරනවා වගේ මිනිස්සු පුරෝපු කල්කටා වල ඊඩ්න් ගාඩ්න් පිටියේ සත්කාරක ඉන්දියාවත් එක්ක තරඟවැදුනු ලෝක කුසලාන අවසාන පූර්ව තරඟෙකදි, 

කලූ,සනා දෙන්නම පළවෙනි ඕවරේම ආපිට හැරිලා පැවිලියන් එකට ගියපු වෙලාවක,

අරා ඇවිල්ලා බැට් කරේ නිකන් අනන්තයෙන් ආ තරු කුමරා වගේ!

කොහේදෝ ඉඳන් නිකන් පාවෙලා වගේ

හදිස්සියෙන් හදිස්සියෙන් ග්‍රවුන්ඩ් එකට ආවා!

දාන දාන බෝලෙට රිදෙන්න ගැහුවා!

අපේ පැත්තට හැරිලා තිබුණු ප්‍රෙෂර් එක විනාඩි 10ක් විතර යනකොට ආයේ ඉන්දියාව පැත්තට හරවන්න අරාට පුළුවන් උනා!

අනිවාර්යයෙන්ම ලෝක කුසලාන තරඟෙකදි පිතිකරුවෙක් වාර්තා කරපු හොඳම කවුන්ටර් ඇටෑකින් ඉනිම විදියට තේරෙන්න අරාගේ ඒ ලකුණු 66 ඉනිමට ඕනවටත් වඩා සුදුසුකම් තියෙනවා.

ඒ විතරක් යෑ,

ඊට දවස් කීපයකට පස්සේ ඔස්ට්‍රේලියාවත් එක්ක තිබුණු ලෝක කුසලාන අවසාන තරඟෙදි පන්දු යවලා විකට් 3ක්,කැච් දෙකක් අරගෙන, අන්තිමට පිත්තෙන් ශතකයකුත් රැස්කරලා,

අපේ පුංචි රටට ලෝක කුසලානයකුත් අරන් දීලා තමයි අරා නතර උනේ.

1996දි ක්‍රිකට් ලෝක කුසලානයක් දින්නට පස්සේ තමයි සමහර පිටරටවල මිනිස්සු මෙහෙම රටක් තියෙනවද කියලවත් අපේ රට ගැන දැනගත්තේ.

අර්ජුන,අරා ඇතුළු ඒ ක්‍රීඩකයින් හැමදෙනාටම අපි හැමෝම ණයගැති වෙන්නේ ඒ නිසයි!

අපේ රටේ ක්‍රිකට් ක්‍රීඩාව කාලාන්තරයක් තිස්සේ ජාත්‍යන්තර මට්ටමේදි ඉහළින්ම වැජඹෙන්න 96න් ලැබුණු ඒ පන්නරය ප්‍රධාන හේතුවක් උනා.

ඔය මම කිව්වේ අවස්ථා දෙකක් ගැන විතරයි.

තව කොච්චර නම් අරා වැඩ පෙන්නපු මැච් අපි බලන්න ඇතිද?

ඒවා ගැන ලියන්න ගියොත් නම් අද ඉවරකරන්න වෙන්නේ නැහැ.

අරා කියන්නේ ඒ තරම් වැඩ පෙන්නපු කෙනෙක්!

එක එක අයට එක එක දේවල් හිතෙයි ඒත් මට හිතෙන විදියට නම් දක්ෂතාවය,හැකියාව අතින් ගත්තම ලංකාවේ බිහිවුණ සුපිරිම පිතිකරුවා අරා.

ඇවරේජ් බලලා අරා වගේ කෙනෙක් ගැන තීරණය කරන්න අමාරුයි.

පළවෙනි ඉනිමේ එක ඉරියව්වකින් පන්දුවට පහරදීලා,

දෙවෙනි ඉනිමෙදි ඊට හාත්පසින්ම වෙනස් ඉරියව්වකින් ඉඳගෙන පන්දුවට පහරදෙන්න හැමෝටම බැහැ.

ඒ විතරක් නෙවෙයි,

බැට් එක අල්ලන තැන,

පෑඩ්ස් දාපු විදිය,

පවා තැනට සුදුසු විදියට අරා වෙනස් කරගෙන තමන්ගේ රාජකාරිය උපරිමයෙන්ම කරපු කෙනෙක් තමයි අරා කියන්නේ.

ඒ වගේම ලංකාවෙන් බිහිවුන කාට උනත් ලෙජන්ඩ් කියන්න කලින් කටපුරා 'ලෙජන්ඩ්' කියලා කතාකරන්න පුළුවන් කෙනෙක්!

- හේලිත හෙට්ටිආරච්චි -