දයාබර අකිල මලේ,
උඹට වරක් දෙවරක් වැරදුනා මිස,
උඹ සදාකාලිකව පැරදුනේ නැත!
එයද සමහරුන්ට ලැබෙන පටු වාසි වෙනුවෙන් උඹව බිල්ලට දුන් නිසා සිදු වූවක් මිස උඹේ අතින් හිතාමතා වූ දෙයක් නොවේය!
එබැවින් ඒ ගැන උඹ කම්පා නොවිය යුතුය!
ගිය දේ ගියේය!
අතීතය අතීතයමය!
අමතක කල යුතු තැන් අමතක කල යුතුමය!
කෙල වූ විට,
කෙලවීමට හේතු වූ කාරණා සොයා එය නිරවුල් කරගන්නවා මිසක,
කෙල වූ තැන නැවතී සෙස්සන්ට දිනුම දිය යුතු වන්නේ නැත.
කාලාන්තරයක් තිස්සේ උඹව දකින අපිට,
ක්‍රිකට් ගහන්න උඹට ඇති ඇම්ම ගැන අමුතුවෙන් කිවයුතු වන්නේ නැත!
ෆීනික්ස් කුරුල්ලාද අළු මතින් නැවත ජීවය ලැබුවා නම් එහෙව් අසීමිත ඇම්මක් ඇති උඹට අනිවාර්යයෙන්ම ගොඩ ඒමට හැකිය!
එය ස්ථීරය!
අම්මාගෙන් සල්ලි ඉල්ලා බුකියට එන සමහර සිඟිති පාතාලේ කල්ලතෝනින් කියන්නාසේ උඹේ ක්‍රිකට් අහවර වී නැත!
උන් දන්නා ක්‍රිකටක් නැත!
උඹේ ක්‍රිකට් මේ ඇරඹුණා පමණි!
ලෝක පූජිත මුරලිටද ලොරි ගණන් බාල්දි වැටුනානම් උඹටද එසේ වීම ගැන උඹ පුදුම විය යුතු නැත.
අනිවාර්යයෙන්ම වැරැද්දක් වී ඇත.
ඒත් එය අවසානය නොවේ!
අනික මේ උඹේ අසීරු වේලාවක් මිස උඹ නැත්තට නැතිවූ වේලාවක් නොවේ!
මිනිසුන් ශක්තිමත් වන්නේ බාධක කම්කටොළු හමුවේ මිස රෝස මල් ඇතිරූ මාවතක සුවපහසු ලෙස ගමන් කිරීමෙන්ද නොවේ.
ගල්මුල් බාධක ඇති රළු පාරක් ලැබීමද එක්තරා අන්දමක වාසනාවකි.
එපමණක් නොවේ,
වංචාකරුවෙක් ලෙස උඹව පට්ට පතුරු හංවඩු ගසන්නන් දෙස උඹ උපේක්ෂාවෙන් බැලිය යුතුය!
උඹ සදාකාලිකව වැටුනොත් උන් ඉහටත් දිනුම්ය!
උඹ වැටෙන තුරු බලා සිට දැන් සේරම හරියැයි කියා උඹට සිනාසෙන අපේම කාලකණ්ණින් වෙනුවෙන් උඹ අනිවාර්යයෙන්ම කල යුතු දෙයක් ඇත.
ඒ පෙර සිටියාටත් වඩා හොඳින් නැවත පිටියේ දස්කම් දැක්වීමයි!
ගෙඩි පිටින් අවුරුද්දක්ම ඇත!
ඉන්තේරුවෙන්ම උඹට මේ අවුරුද්ද අහවර වන විට ගොඩ ආ හැක!
මුළු ක්‍රිකට් ලෝකය පුරාම විසිරී සිටින ප්‍රේක්ෂකයින් ලක්ෂ ගණනක් තවමත් උඹ ගැන දහසක් බලාපොරොත්තු දල්වාගෙන බලාසිටී!
උඹට බැරි නැත!
අනිවාර්යයෙන්ම උඹ ගොඩ එනවා ඇත!
කාට නැතත් එය අපට විශ්වාසය!
උඹට ජයෙන් ජයම ලැබේවා!
- හේලිත හෙට්ටිආරච්චි -
No comments:
Post a Comment