"ක්‍රිකට් ක්‍රීඩාවේ පියා කවුද?"
කියන ප්‍රශ්නෙට උත්තරේ වෙන්නේ 'W.G ග්‍රේස්' නම් ක්‍රීඩකයාගේ නම.
අවුරුදු 35කටත් වැඩි කාලයක් ක්‍රිකට් ක්‍රීඩා කරපු ග්‍රේස් කියන්නේ ක්‍රිකට් නීති පොතේ අඩු ලුහුඬුකම් නැතිකරන්නත් ක්‍රිකට් ක්‍රීඩාව වර්ධනය කරන්නත් මහඟු දායකත්වයක් ලබාදීපු ක්‍රීඩකයෙක්.
ඒ වගේම ග්‍රේස් කියන්නේ ආතල් දීමටම උපන් ක්‍රීඩකයෙක්...!
ඉතින් මේ ග්‍රේස් කරපු ආතල් වැඩ දෙකක් ගැනයි මේ ලියන්න යන්නේ.
- පාආවරණයෙන් 6 පහරක් ගැසීම -
තරඟයක් අතරවාරයේ පන්දුවට පහරදීපු ග්‍රේස්ට පන්දුයවන්නා පිරිනමපු පන්දුව පිත්තේ අග වැදුනට පස්සේ පා ආවරණය තුල හිරවෙනවා.
දැන් මේ හිරවෙච්ච පන්දුව බිම නොවැටී පන්දුරකින්නෙක් අතට ගියොත් උඩපන්දුවක් විදියට සලකන නිසා කඩුළු රකින්නා ඇතුළු බහුතරයක් පන්දුරකින්නෝ දුවන් එනවා ග්‍රේස් දිහාවට.
මේක දැකපු ග්‍රේස් ඔරේ රන් එකක් දෙනවා බවුන්ඩ්‍රි ලයින් එක පැත්තට.
අන්තිමට මේ දිවීමේ තරඟෙන් පන්දුරකින්නෝ පරාජය කරපු ග්‍රේස් හිරවෙලා තිබ්බ බෝලේ හලන්නේ බවුන්ඩ්‍රි ලයින් එකෙන් එහාට ගිහින්.
මේක මහ කුණුහබ්බ වැඩක් උනත් නීතිය අනුව බෝලේ බිම නොවැටී බවුන්ඩ්‍රි ලයින් එක පහුකරපු නිසා ලකුණු පුවරුවේ ග්‍රේස්ගේ නමට ලකුණු 6ක් එකතුවෙනවා.
- අම්පයර්ට කොකා පෙන්නීම -
එක තරඟයකදී පන්දුවට පහරදෙන්න ආපු ග්‍රේස් පළවෙනි පන්දුවෙන්ම දැවී යනවා.
දැවී යන්නේ කඩුල්ල මුවා කිරීමේ වරදට අසුවෙලා.
ග්‍රේස්ගේ දැවීයාම සනාථ කරන්නේ විනිසුරුවරයා විසින්.
ඒ ඉතින් අර අපි හැමෝම දන්න විදියටම තමා.
"ඇඟිල්ල උස්සලා..!"
විනිසුරු ඇඟිල්ල ඉස්සුවට පස්සේ ග්‍රේස් යනවා විනිසුරු ගාවට.
"මේ.. මිනිස්සු මෙතනට එන්නේ තමුසේ ඇඟිල්ල උස්සනවා බලන්න නෙවේ.
මම ගහනවා බලන්න...!"
විනිසුරු තීරණය අධෝවාතයක් තරම්වත් ගණන් ගත්තේ නැති ග්‍රේස් අන්තිමට නතරවෙන්නේ ශතකයකුත් රැස්කරලා.
සුද්දා ඔය අපේ උන්ට සද්දේ දැම්මට උන්ගෙම ජාතියේ අලි පත ඩයල් වලට සද්දේ දාන්න බය නිසා 'ගෝරිං අප්පු' වගේ හිටපු ග්‍රේස්ගෙන් ගේමක් ඉල්ලන්න කවුරුත් ඉඳලා නෑ.
හැබැයි මේවගේ දේවල් ඒ කාලේ උන නිසා තමයි පසුකාලීනව,
"විනිසුරු තීරණය අවසාන තීරණය"
විදියට දැඩිව සලකන්න මූලික උනේ.
- හේලිත හෙට්ටිආරච්චි -
No comments:
Post a Comment